featured photo: Mansarowar Times

मुख्य निर्वाचन अधिकृतको कार्यालय हुम्लाले कर्मचारी खटन पठनको कार्य पुरा गरेको छ । आगामी फागुन २१ गते हुने प्रतिनिधि सभा सदस्य निर्वाचनलाई लक्षित गरी उक्त कार्य गरेको सोही कार्यालयका प्रवक्ता श्रीदिप वाग्लले बताएका छन् ।

यसपालीको निर्वाचनमा उक्त कार्यालयले जम्मा ३ सय ६९ जना कर्मचारीलाई मतदान स्थल तथा मतदान केन्द्रमा खटाएको छ । जसमा मतदान अधिकृत ६४, सहायक मतदान अधिकृत ६४, सहायक कर्मचारी १ सय ७७ जना र सहयोगी कर्मचारी ६४ जना गरी जम्मा ३ सय ६९ जना खटाइएको मुख्य निर्वाचन अधिकृत निलकण्ठ बरालले बताएका छन् । जसमा जिल्लाका ६४ वटा मतदान केन्द्र मध्य ३९ वटा मतदान केन्द्रमा ३ जना सहायक कर्मचारीका दरले १ सय ४७ जना र १५ मतदान केन्द्रमा २ जना सहायक कर्मचारीका दरले ३० जना कर्मचारी खटाइएको प्रवक्ता वाग्लले बताएका छन् ।

यसअघि आयोगले गरेको परिपत्र अनुसार मतदानका लागि खटिने कर्मचारी सङ्ख्या समेत घटेको छ । यसअघि ५ सय २५ जना कर्मचारी निर्वाचन कार्यका लागि खटाउने भनिएकोमा आयोगको पछिल्लो परिपत्र अनुसार तीन सय भन्दा कम मतदाता भएको मतदान केन्द्रमा एक जना सहायक कर्मचारी खटाउने भन्ने भए बमोजिम कर्मचारीको संख्या घटेको हो ।