हुम्ला,
कोभिड–१९ को संक्रमण बढ्दै गएपछि हुम्ला जिल्लाका १९ जनाको जेठ १६ गते यता स्बाव संकलन गरिए पनि जेठ १८ गते मात्र जहाजमार्फत प्रदेश अस्पताल सुर्खेत परिक्षणका लागि पठाइएको छ ।
कर्णाली माध्यामिक विद्यालय चौगानफयाको क्वारेन्टाइन बसेका पाँच जना, जिल्ला समन्वय समिति कार्यालय बसेका छ जना, दुई जना नेपाली सेना, राष्ट्रिय वाणिज्य बैँकका पाँच जना र सिमकोट गाउँपालिका एक जना गरी १९ जनाको स्वाब संकलन गरिएको थियो ।

संकलन गरिएका स्वाब प्रदेश अस्पताल सुर्खेतमा जहाजमार्फत पठाइएका व्यक्तिहरुको रिर्पोट भने जेठ १९ गतेसम्म आउने जिल्ला स्वास्थ्य सेवा कार्यालय हुम्लाका प्रमुख प्रेमबहादुर सिहंले जानकारी दिए ।
छुटेका जनप्रतिनीधिहरुको स्वाब पूर्ण संकलन गरिने प्रमुख सिहंको भनाई छ । प्रमुख सिंहका अनुसार जिल्ला स्वास्थ्य सेवा कार्यालयमा हाल १ सय ६० वटा भिटिएम र ३ सय ४५ वटा आरडिटी किट बाँकी रहेको जानकारी आएको छ ।

तर पछिल्लो समयमा हुम्लाको तल्लो भेगका चरावटा गाउँपालिकामा जेठ १६ गते यता गाडीबाट पठाइएका करीव १ सय भन्दा बढि व्यक्तिहरु जिल्ला पुगि सकेका छन भने माथिल्लो भेगका तीन गाउँपालिकामा जहाजद्धारा ओसार्ने भनिएता पनि त्यसको यकिन भएको छैन ।
जिल्लामा मानिसहरुको भित्रिने संख्यामा बढ्दो क्रम भएपछि भिटिएम र आरडिटी किटको भने अभाव हुने प्रत्यक्ष देखिएको जिल्ला स्वास्थ्य सेवा कार्यालय हुम्लाको श्रोतले जनाएको छ ।
सो कार्यालयले केही दिन अगाडी जिल्लाका क्रियाशिल व्यक्तिहरुको पिसिआर परिक्षण एक मुष्टमा गर्ने भनिएता पनि हाल दुई चार जनाको संख्यामा पनि चेकजाँच गर्ने गरेको देखिएको छ । जसमा परिक्षण गर्नेमा स्वास्थ्यकर्मी, सञ्चारकर्मी र सुरक्षाकर्मी लगायतका व्यक्तिहरु परेका हुन् ।