हुम्ला,
कर्णाली प्रदेशको सामाजिक विकास मन्त्रालयको पहलमा जेठ ८ गतेबाट हुम्लाका स्वास्थ्यकर्मी, सुरक्षाकर्मी, एयरलाइन्स, बैंक र संञ्चारकर्मी लगायतका व्यक्तिहरुको पिसिआर परिक्षण सुरु गरेको छ ।
जिल्लामा रहेका क्वारेन्टाइन स्थलहरुमा अनुगमन तथा त्याँहाका समस्याहरुको बारेमा बुझ्नका लागि लगातार खटि रहनु पर्ने भएको हुँदा सो मन्त्रालयले तुरुन्तै उनिहरुको पिसिआर परिक्षण गराउँने भन्ने निर्णय गरे अनुसार हुम्लाको जिल्ला स्वास्थ्य सेवा कार्यालयले पिसिआर परिक्षण गरि रहेको जिल्ला स्वास्थ्य सेवा कार्यालय हुम्लाका ल्याप टेक्निसियन भक्ति फडेराले बताए ।
जिल्लामा कृयाशिल भएर काम गर्ने करीव १३ जना पत्रकार भए पनि हाल ८ जनाकोमात्र चेक जाँच भएको छ । त्यस्तै ४८ जना स्वास्थ्यकर्मी, ४९ जना सुरक्षाकर्मी, २४ जना एयरलाइन्समा काम गर्ने, पाँच जना सिटिजन्स बैँकका कर्मचारी, दुई जना जनप्रतिनिधि र अन्य १३ जना होम क्वारेन्टाइनमा बसेका गरेर जम्मा १ सय ४८ जना व्यक्तिहरुको स्वाव संकलन गरिएको जिल्ला स्वास्थ्य सेवा कार्यालय हुम्लाको स्रोतले जनाएको छ ।
बाँकी जिल्लामा रहेका कृयाशिल पत्रकार, जनप्रतिनिधि, स्वास्थ्यकर्मी लगायतको स्वाव संकलनका लागि केही दिन लाग्ने सो कार्यालयका प्रमुख प्रेमबहादुर सिंहले बताए । सोही दिन पिसिआर चेक जाँच गरिएका कर्मचारीहरुको स्वावलाई जेठ ९ गते कर्णाली प्रदेशको सुर्खेतमा पठाइएको छ भने सोको रिर्पोट जेठ १० गतेसम्म आई सक्नु पर्ने ल्याप टेक्निसियन फडेराको भनाई छ ।
हुम्लाका सातवटै गाउँपालिकमा १ हजार ६० पिसिआर किट आएको मध्ये ८ सय ३७ जनाको परिक्षण भएर २ सय २३ पिसिआर किट परिक्षण गर्न बाँकी रहेको जिल्ला स्वास्थ्य सेवा कार्यालय हुम्लाको श्रोतले जनाएको छ ।