पर्सा जिल्लामा पाँच जना थुनुवासहित ३२ जनामा कोरोना भाइरस संक्रमण पुष्टि भएको छ। थुनुवा मध्ये चार भारतीय नागरिक रहेका छन्।

नारायणी अस्पताल स्थित पीसीआर प्रयोगशालामा बिहीबार गरिएको परीक्षणमा उनीहरुको रिपोर्ट पोजेटिभ आएको हो। वडा प्रहरी कार्यालय श्रीपुरको थुनुवा कक्षमा रहेका २५, २२, ३३, २२ र ४७ वर्षका गरी ५ जना थुनुवामा कोरोना संक्रमण पुष्टि भएको नारायणी अस्पतालले जनाएको छ ।

संक्रमित ४ जना भारतीय हुन्। ३ जना बिहार र १ जना उत्तर प्रदेशका छन्। चार भारतीय अवैध तरिकाले नेपाल छिरेका र उनीहरुलाई प्रहरीले समातेर हिरासतमा राखेको र उनीहरुको पीसीआर परीक्षण गर्दा कोरोना पोजेटिभ देखिएको गण्डक कोभिड अस्पतालले जनाएको छ ।

अन्य संक्रमित भने कन्ट्राक ट्रेसिङमा परीक्षण गर्दा पोजेटिभ देखिएको थियो। यसैबीच वीरगञ्जका विभिन्न अस्पतालमा कार्यरत चिकित्सक र उपचाररत बिरामीमा समेत कोरोना संक्रमण पुष्टि भएपछि नेपाल चिकित्सक संघ पर्साले आकस्मिक बाहेकका सेवा बन्द गर्न आव्हान गरेको छ।