आज बिहान गएको पहिरोले हुमलाको ताँजकोट वडा ४ को खर्राको दलित वस्तीका २२ घरधुरीले वस्ती छोडेका छन् ।

लगातारको वर्षाले खर्राको जिमकोइला खोलामा गएको पहिरो दलित वस्तीका सबै घर भत्कीने अवस्था भएपछि आज बिहानै देखि सबैले घर छोडेर अन्यत्र बसेको सम्बधिन्तस्थलबाट धनसुर दमाइले जानकारी दिनुभयो । पहिरोले २ घरमा क्षेती पुगेको छ भने अन्य सबै घरको नाजुक रहेको अवस्था आएपछि बिहानदेखि वस्तीका सबै घर परिवारले आफ्नो घर छोडेर देउला गैरामा पाल टाँगेर बसेको बताएका दमाइले राससँग भने, “पहिरोले हाम्रो त उठीवास गरायो ।”

खानापानी खाने अवस्था समेत नभएको उल्लेख गरेका तुथा परियारका अनुसार माथिबाट आएको सुख्खा पहिरोले घर झुण्डीएको अवस्थामा रहेपछि सबै घरका स्थानीयले घर खाली गरेर बारीमा सरेका छन् ।

हामीले लगाएको मकै, कोदो, धान बाली लगाएका बारी सबै पहिरोले छोपेर लगेपछि घर पहिरोमा झुण्डीका अवस्थामा रहेका छन् । तुथाले भनिन्, “झुण्डीएको अवस्थामा रहेका घरलाई कतिखेर पहिरोले बगाउने हो भन्ने डर भएपछि दलित वस्तीका सबै घरधुरीले आफ्ना घर खाली गरेका छन् ।”

पहिरोमा परेर मानविय र पशुचौपाएको क्षती नभएपनि प्रति घर ४ हल जग्गा बगाएर लगेको स्थानीय धनसुर परियारले बताउनुभयो । पहिरो स्थलबाट प्रहरी चौकी निकै टाढा भएपछि क्षतीको एकिन विवरण आउन बाँकी छ । पहिरो गएर दलित वस्ती जोखिममा रहेको खबर आएको बताएका प्रमूख जिल्ला अधिकारी चिरञ्जिवी गिरीले कवाडी सिमा प्रहरी चौकीको टोलीलाई स्थलगत रुपमा बुझ्न पठाएको जानकारी दिनुभयो ।