आगामी फागुन २१ गते हुने प्रतिनिधिसभा सदस्य निर्वाचनका लागि हुम्ला जिल्लामा मुख्य निर्वाचन अधिकृतको कार्यालय स्थापना गरिएको छ । प्रतिनिधि सभा निर्वाचन क्षेत्र एउटा मात्रै रहेको हुम्ला जिल्लामा मुख्य निर्वाचन अधिकृतको कार्यालय सदरमुकाम सिमकोटमा स्थापना गरिएको हुम्ला जिल्ला अदालतका श्रेस्तेदार श्रीदीप वाग्लेले बताएका छन ।

जिल्ला सदरमुकाममा रहेको हुम्ला जिल्ला अदालतमा मुख्य निर्वाचन अधिकृतको कार्यालयको व्यानर पढे र उत्घाटनका क्रममा हुम्ला जिल्ला अदालतका न्यायाधीश एव मुख्य निर्वाचन अधिककृत निलकण्ठ बरालले भौगोलिक कठिनाइ, कमजोर पूर्वाधार र सीमित पहुँचका बाबजुद हिमाली जिल्ला हुम्लामा निर्वाचन सफलतापूर्वक सम्पन्न गर्नु चुनौतीपूर्ण कार्य भएको, यस्तो परिस्थितिमा मुख्य निर्वाचन अधिकृतको कार्यालय स्थापना हुनु भनेको निर्वाचन व्यवस्थापन, समन्वय र निगरानीलाई एकीकृत र प्रभावकारी बनाउने आधार तयार हुनु हो, यसले मतदाता दर्तादेखि उम्मेदवारी प्रक्रिया, मतदान व्यवस्थापन र मतगणनासम्मका सम्पूर्ण गतिविधिलाई कानुनी दायराभित्र सुव्यवस्थित ढंगले सञ्चालन गर्न सहयोग पुर्‍याउनु रहेको बताएका थिए ।

निर्वाचन सामूहिक प्रयासबाट मात्र सफल हुन्छ यसले निर्वाचनको मर्मलाई सही रूपमा उजागर गर्छ। निर्वाचन आयोग, प्रशासन, सुरक्षा निकाय, राजनीतिक दल, सञ्चारमाध्यम र स्वयं मतदाता—सबैको जिम्मेवारी र सहकार्य बिना लोकतान्त्रिक अभ्यास सार्थक हुन नसक्ने श्रेस्तेदार श्री दीप वाग्लेले बताएका थिए ।

मतदाताको विश्वास जित्ने, राजनीतिक प्रतिस्पर्धालाई मर्यादित बनाउने र जनमतको सम्मान गर्ने वातावरण सिर्जना गर्नु नै यसको प्रमुख दायित्व रहेको प्रमुख जिल्ला अधिकारी टेककुमार रेग्मीले बताएका थिए ।

आगामी निर्वाचन केवल प्रतिनिधि चयनको प्रक्रिया मात्र होइन, लोकतन्त्रप्रतिको जनविश्वासको परीक्षा पनि हो। हुम्लामा स्थापना भएको मुख्य निर्वाचन अधिकृतको कार्यालयले त्यो विश्वासलाई मजबुत बनाउने दिशामा इमानदार, साहसी र कानुनसम्मत भूमिका निर्वाह गर्ने अपेक्षा जिल्लामा क्रियाशील राजनीतिक दलहरूले गरेका छन ।