हुम्ला जिल्लाबाट प्रतिनिधि तथा प्रदेश सभामा प्रतिनिधित्व गर्ने निर्वाचित सदस्यहरुको घोषणा र प्रमाणपत्र बितरण गर्ने कार्य भएको छ । मुख्य निर्वाचन अधिकृतको कार्यालयले आइतबार एक कार्यक्रम आयोजना गरेर सो कार्यक्रम गरेको हो । मुख्यनिर्वाचन अधिकृत दिलप्रसाद सापकोटाले प्रतिनिधि सभामा छिरिङ डम्डुल लामा ( कार्चेन) र प्रदेश सभा क नम्बरमा रणसिंह परियार तथा ख नम्बर क्षेत्रमा कर्णाली प्रदेशका मख्यमन्त्री जीवनबहादुर शाहीलाई निर्वाचित भएको औपचारिक घोषणा गरेका थिए ।घोषणापछि मुख्यनिर्वाचन अधिकृत सापकोटाले निर्वाचित सदस्य पदको प्रमाण पत्र समेत प्रदान गरेका थिए । मङ्सिर १० गते शनिवार परेको कारण सो कार्यक्रम आज राखिएको थियो ।

सो कार्यक्रममा बोल्दै मुख्य मन्त्री जिवनबहादुर शाहीले बिकासका लागि अब जिल्लाका सबै जिम्मेवार पक्ष लाग्नु पर्ने, जनताले अब जिम्मेवारी दिएको र त्यसलाई सफल रुपमा भूमिका निर्वाह गर्ने जिम्मा जनप्रतिनिधिमा आएको उनले बताए । निर्वाचन निष्पक्ष र शान्तिपुर्ण रुपमा सम्पन्न गर्न भूमिका निर्वाह गर्ने सबै जिम्मेवार पक्षलाई उनले धन्यवाद समेत दिए ।

त्यसैगरि प्रतिनिधि सभाका लागि निर्वाचित सदस्य छिरिङ डम्डुल लामाले जनताले दिएको माया अनुसार अगाडी बढ्ने प्रतिबद्धता ब्यक्त गरे , उनले आफु सकेसम्म जिल्लाको विकासका लागि काम गर्ने तर नसके बिग्रीने काम कहिल्यै नगर्ने बताएका थिए । त्यसैगरि प्रदेश सभा क नम्बर क्षेत्रका सदस्य रणसिंह परियारले दलितको छोरोलाई जनताले पहिलो पटक पत्याएको बताउतै अब प्रदेश सभामा दलितका मुद्धालाई बुलन्द रुपमा उठाउने बताए ।

प्रमुख जिल्ला अधिकारी सीता परियारले हुम्ला प्रतिनिधि तथा प्रदेश सभामा प्रतिनिधित्व गर्ने माननीयबाट जिल्लाको बिकासका लागि योगदान रहने बिस्वास ब्यक्त गरेकी थिइन । कार्यक्रममा मुख्यनिर्वाचन अधिकृत सापकोटाले छिफुट बिबाद घटना बाहेक समग्रमा जिल्लामा निर्वाचन शान्तिपुर्ण रुपमा सम्पन्न भएकोमा सहयोगी सबै निकायलाई धन्यावद दिए ।