हुम्लाको एक गाउँपालिकाले जिल्लामा आएको महालेखा परिक्षणको टोलीलाई गाउँपालिकामै लगेर अन्तिम लेखा परिक्षण गरेको छ । यसअघि मलेप आएको बेला सदरमुकाम सिमकोटमा गर्ने गरिएको भएपनि यस वर्षबाट पहिलो पटक गाउँपालिका केन्द्रमा टोली लगेर मलेप गर्ने कार्य गरिएको हो ।

सर्केगार्ड गाउँपालिकाका प्रमुख प्रशासकीय अधिकृत नर रावतले पहिलो पटक मलेप टोलीलाई गाउँपालिका केन्द्र सर्केगार्डमा बोलाएर अन्तिम लेखा परिक्षण गरिएको बताए । उक्त गाउँपालिकाले यस अघिका पाँच वर्षसम्म लगातार श्रेष्ता सिमकोट बोकेर मलेप गर्ने गरेको थियो । उनले आबश्यक कागताज बोक्ने झण्झट तर्फ लाग्नु भन्दा गाउँपालिकामै टोली बोलाएर लेखा परिक्षण गर्ने निष्कर्षमा गाउँपालिका पुगेकोले त्यो संभव भएको बताए ।

सिमकोटमा लेखा परिक्षण गरिएको भए टोलीले केही शंका लागेका योजना भए स्थलगत निरीक्षण गर्न संभव हुने थिएन । तर गाउँपालिकामा गरिएको कारण टोलीले दुई चार वटा योजनाको स्थलगत अनुुगमन गरेको उनले बताए । अधिकृत रावतले संभव भएसम्म बेरुजुको भोलुम घटाउने आफ्नो मुख्य लक्ष भएको बताउदै गत वर्षको भन्दा बढी बेरुजु औल्याईए आफ्नो पदबाट राजीनामा दिने यसअघि नै घोषणा गरि सकेका छन् ।

गत वर्ष उक्त गाउँपालिकको बेरुज १२ करोड ९६ लाख रहेको थियो । छ सदस्यीय मलेपको टोली हेलिकोप्टरमा सर्केगार्ड पुगेको थियो । टोलीले लेखा परिक्षण गर्ने कार्य सम्पन्न् भएको र अब प्रतिबेदन तयारी पछि मात्र बेरुजुको अबस्थाका बारेमा भन्न सकिने जनाएको छ । सर्केगार्डबाट सिमकोट पुग्न एक देखि डेढ दिन पैदल लाग्ने गर्छ ।