कर्णाली प्रदेशको हुम्ला जिल्लाको सदरमुकाम सिमकोट बजार क्षेत्रको सरसफाइ गर्ने कार्य कर्मचारी र जनप्रतिनिधिको भर पर्नुपर्ने अवस्था आएको छ। घरधनी र बहालमा बस्नेले आफ्नै अगाडि सरसफाइ नगर्ने भएको कारण अरुले आएर सरसफाई गर्नुपरेको हो।

सुक्रबार विहान प्रमुख जिल्ला अधिकारी सीता परियारको नेतृत्वमा सिमकोट बजारको सरसफाइ गर्ने कार्य भएको छ। जताततै फोहोर बढेर दुर्गन्धित हुन थालेपछि सरसफाइ गर्ने कार्य भएको हो। कुचो समातेर आफै सरसफाइमा खटिएकी प्रमुख जिल्ला अधिकारीले बजारलाई स्वच्छ र सफा राख्न उक्त अभियानमा लागेको र यस पछि जो जसले फोहोर बजारको बाटो सडकमा फाल्छ निजलाई जरिवाना गर्ने जिम्मा सुरक्षाकर्मीलाई लगाइ फोहोर फाल्नेलाई १ हजार रुपैयाँ जरिवाना गरी सुरक्षाकर्मीले रसिद काट्ने प्रमुख जिल्ला अधिकारी परियारले बताइन्मु बताएकी छन ।

मुख्य–मुख्य चोकमा फोहोरको थुप्रो लाग्दै आएको थियो। त्यसैगरी, ढलमा पनि फोहोर भरिएर पानी समेत सडकमा आउन थालेपछि मानिसलाई आवतजावतमा समस्या हुने गरेको बेला सरसफाइ गरिएको हो। सरसफाइ गरेर जम्मा पारिएको फोहोरलाई बोहरा राखी ट्र्याक्टरबाट डम्पिङ साइट लग्ने कार्य सिमकोट गाउँपालिकाले गरेको सिमकोट गाउँ पालिका अध्यक्ष पदमबहादुर लामाले बताएका छन्।

उनले स्वच्छ र सफा सिमकोट बनाउन घरधनी र भाडामा बस्नेलाई सरसफाइ अभियानमा स्वतस्फुर्त लाग्ने वातावरण बनाउन आवश्यक रहेको बताएका छन। उनले बजार क्षेत्रभरि जताततै फोहोर बढेपछि त्यसबाट सफा राख्न अब साप्ताहिक रुपमा सरसफाइ अभियान सञ्चालन गर्ने जानकारी दिएका छन ।

त्यससँगै अब आफ्नो घर अगाडिको फोहोर नउठाउनेलाई जरिवाना गर्ने नियम पनि चाँडै गाउँपालिकाले ल्याउने अध्यक्ष लामाले बताएका छन ।