हुम्ला जिल्ला निर्वाचन कार्यालयले स्थानीय तहको निर्वाचनमा भाग लिने मतदाताको विवरण दाबीविरोधका लागि हरेक स्थानीय तहमा पठाएको छ । निर्बाचन कार्यालयले मतदाताको नामावली टाँस गरेर गल्ती सच्याउन लागेको हो ।

सरकारले वैशाख ३० मा घोषणा गरेको स्थानीय तह निर्वाचन आउन ७४ दिन मात्रै बाँकी छ । निर्वाचनमा हुम्ला जिल्लामा ३२ हजार ८ सय ४६ मतदाता हुन सक्ने निर्बाचन कार्यालय हुम्लाको अनुमान छ ।

तथ्यांकमा पछिल्लो चार वर्षमा मृत्यु भइसकेका, बसाइँ सरेका व्यक्तिको नाम पनि समावेश छ । ‘जिल्ला निर्बाचन कार्यालयमा रहेको मतदाता नामावलीमा त्रुटि हुन सक्ने भएकाले सच्याउन वडास्तरमा टाँस्न पठाइसकेका छौँ,’ जिल्ला निर्वाचन अधिकारी स्यामबहादुर रानाले बताएका छन् ।

‘वडाबाट दाबीविरोधसहितको विवरण आएपछि निर्बाचन कार्यालयले सच्याउनेछ । अनि मात्रै अन्तिम मतदाता नामावली तयार हुन्छ ।’ वडास्तरमा मतदाता नामावली १८ गते सम्म टाँसिँदै छ । निर्बाचन कार्यालयका अनुसार कुनै व्यक्तिको दोहोरो नाम परे, उमेर, थर फरक परे दाबीविरोधका क्रममा सच्याउन सकिनेछ ।

मतदाता नामावली अद्यावधिक गर्न आफ्नो विवरणमा कुनै त्रुटि भएमा इमेल र फ्याक्समार्फत निवेदन दिन सक्ने निर्णय पनि गरेको छ । यसअघि निर्वाचन कार्यालयमै गएर सच्याउनुपर्ने बाध्यता थियो । मतदाता परिचयपत्र हराएको व्यक्तिले शुक्रबारसम्म निवेदन दिन सक्ने निर्बाचन अधिकारी रानाले बताए ।