२० मंसिर २०८२, शुक्रबार
राज शाही बुधबार, मंसिर ०८, २०७८ मा प्रकाशित
हिमाली जिल्ला हुम्लामा कोरोना बिरुद्धको खोप ४९ दशमलव नौ प्रतिशत नागरिकले लगाएका छन् । केन्द्रबाट स्वास्थ्य सेवा कार्यालयमा उपलब्ध भएको भ्याक्सिन जिल्लाका सबै गाउँपालिकामा तोकिएका उमेर समुहका नागरिकलाई लगाउने कार्य भएको हो ।
जिल्ला स्वास्थ्य सेवा कार्यालय प्रमुख प्रम बहादुर सिंहका अनुसार जिल्लामा उपलब्ध भएको भ्याक्सिन ३६ हजार ४ सय ४७ डोजमा ३३ हजार २ सय ४७ डोज खर्च भएको छ । कुल खर्च भएको खोपमा कोरोना बिरुद्ध दुबै डोज लगाउने नागरिक मंगलबारसम्म १६ हजार ६ सय ९१ रहेको छ । खोप लगाउनेमा १८ वर्षका युवा युवतीदेखि ९० वर्षका जेष्ठ नागरिक रहेका छन । खोप लगाउनेमा महिला भन्दा पुरुषको संख्या बढी रहेको कार्यालयले जनाएको छ । हुम्लामा जोन्सन एण्ड जोन्सन, भेरोसेल र कोभिशिल्ड खोप उपलब्ध भएको थियो ।
यो खोप जिल्लाका सात वटै गाउँपालिका नाम्खा, सिमकोट, खार्पुनाथ, सर्केगार्ड, चंखेली, अदानचुली र ताँजाकोटमा लगाईएको छ । यसमा हिमालपारीको गाउँ लिमी, चाला, ताँजाकोट गाउँपालिकाको दुर दराजको बस्ती मासपुर र अर्को टाढाको चंखेली गाउँपालिकाको नेक्पामा स्वास्थ्यकर्मी पुगेर लगाईएको छ । यसका लागि असी भन्दा बढी स्वास्थ्यकर्मी परिचालन भएको कार्यालयले जनाएको छ ।
हाल अब कार्यालयसंग तीन हजार दुई सय डोज मौज्दात रहेको र त्यो पनि लगाउने कार्य जारी रहेको छ । जिल्लाको कुल ५१ हजार ५ सय ४३ जनसंख्यामा १८ वर्ष माथि उमेर समुहका खोप लगाउनु पर्ने नागरिक ३४ हजार रहेको अनुमान कार्यालयले गरेको हो । अब बाँकी खोपको लागि पनि माग भई सकेको बताउदै उनले खोप आउने बित्तिक्के सबै तिर स्वास्थ्यकर्मी परिचालन गरिने बताएका छन् ।
२२ औं महिला स्वास्थ्य स्वयंसेविका दिवस विभिन्न कार्यक्रम गरि मनाइयो
हुम्लाका छ दर्जन बढी योजनाको काम चिसोले प्रभावित
हेड नेपालको सहयोगमा ३४ औ अन्तराष्ट्रिय अपाङ्गता दिवस मनाइयो
