हुम्ला

१३ वर्षीया बालिकालाई बलात्कार गरेको आरोप लागेका दुईजनालाई प्रहरीले डेढ वर्षपछि पक्राउ गरेको छ । गत वर्ष ०७६ साउन २१ मा १३ वर्षीया बालिकालाई लुगा धुन गएको वेला पाँचजनाले सामूहिक बलात्कार गरेको आरोप छ । तीनजनालाई प्रहरी घटनालगत्तै पक्राउ गरे पनि दुईजना फरार थिए ।

फरार दुईजनालाई प्रहरीले डेढ वर्षपछि पक्राउ गरेको प्रहरी नायब उपरीक्षक सूर्यप्रकाश सुवेदीले बताएका छन् । पक्राउ पर्नेमा सर्केगार्ड गाउँपालिका– ६ का १८ वर्षका सन्देश बुढाथोकी र सोही गाउँका मानदेव बुढाथोकी रहेका छन् । फरार रहेका उनीहरूलाई जिल्ला प्रहरी कार्यालय हुम्लाबाट खटिएको प्रहरी टोलीले आज बिहान ४ बजे पक्राउ गरेको हो ।

घटनालगत्तै पक्राउ परेका दुईजना पुर्पक्षका लागि बाँकेमा थुनामा रहेको र एकजना नाबालक भएकोले बालसुधार गृह हिरमुनिया बाँकेमा रहेको जिल्ला प्रहरी कार्यालय हुम्लाले जनाएको छ । सुक्रबार सम्म उनीहरुलाई प्रहरीले जिल्ला प्रहरी कार्यालयमा ल्याउने जानकारी प्राप्त भएको छ ।