हुम्ला

नेपालीहरूको महान् चाड बडादशैँ अन्तर्गत नवरात्रको आज सातौँ दिन । आज घर–घरमा फूलपाती भित्र्याइँदै छ । घटस्थापनाका दिनदेखि वैदिक विधिपूर्वक दुर्गालाई आहृवान गरी पूजाआजा गरिएको दशैँघर अथवा पूजाकोठामा शुभ साइतको प्रतीकका रूपमा उखु, हलेदो, केराको बोट, धानको बाला, बेलपत्र, दारिम, जयन्ती, अशोकको फूल र अन्य नयाँ पालुवासमेत भित्र्याउने गरिन्छ ।

नेपाली सेना नेपाल प्रहरी र सस्त्र प्रहरी लगाएतका राष्ट्र सेवक कर्मचारीहरु आज हुम्ला जिल्ला सिमकोट गाउँ पालिकाको थलहाल्नाबाट बाजागाजा सहित जिल्ला प्रहरी कार्यालय जिल्ला प्रशासन कार्यलय नयाँ भैरवी दल गुल्म र सस्त्र प्रहरी वल लगाएतका कार्यालयमा भित्राइएको हो । त्यसै गरी आज हुम्ला जिल्लाका मुख्य कार्यालयहरु अदालत लगाएतका कार्यालयमा खसीको वली दिइ झण्डापुजा समेत गरिएको छ ।

फूलपाती नौ देवीको प्रतीकका रूपमा भित्र्याई शास्त्रीय विधिअनुसार शक्तिको आराधनाका साथ पूजा गर्ने वैदिक विधि रहेको छ । नवरात्रमा पहिलो दिन शैलपुत्री, दोस्रो दिन ब्रहृमचारिणी, तेस्रो दिन चन्द्रघण्टा, चौथो दिन कुष्माण्डा, पांचौं दिन स्कन्दमाता, छौटौं दिन कात्यायनी, सातौं दिन कालरात्री, आठौं दिन महागौरी र नवौं दिन सिद्धिदात्रीको पूजा गर्ने गरिन्छ ।

दशैँ पर्वलाई असत्यमाथि सत्य र आसुरी शक्तिमाथि दैवी शक्तिको विजयको प्रतीकका रूपमा मनाउने गरिन्छ । घटस्थापनादेखि विजयादशमीसम्मको अवधिलाई नवरात्र पनि भनिन्छ । यस अवसरमा दुर्गादेवीको विशेष आराधना गरिन्छ । दुर्गा देवीका तीन रूप महाकाली, महालक्ष्मी र महासरस्वतीको नवरात्रभर विधिपूर्वक आहृवान गरी पूजा गरिन्छ । यस वर्ष कोरोना भाइरस (कोभिड–१९)को संक्रमणलाई नियन्त्रण र रोकथामका लागि देवीका मन्दिरहरू शक्तिपीठमा नियमित पूजाबाहेक अन्य पूजा–अर्चना बन्द गरिएको छ ।